EDITORIAL: Primeiros pasos

/Raquel Semitiel / Manuel Antonio Lareo

Con sentido, paseniño, sen facer ruído, con tino, cos pés no chan: así é como bota a andar hoxe o novo medio xornalístico de Teo.

Todo comezou hai un ano, como froito dun traballo final do grao de periodismo; o que moitos poden ver como unha tortura.

Despois de moitos días e moitas horas, demos coa idea. Acabamos por atopar algo máis que unha oportunidade: unha necesidade.

Por que un pobo coma Teo carecía dun medio de comunicación? Puxémonos mans á obra para pescudar, investigar, estudar, e coñecer a fondo todo o que nos podía aportar a nosa vila. Falamos coa xente, estudamos a outros medios xa existentes, e chegamos a comprender que faltaba moita información que aportar á cidadanía. Unha cidadanía que agora, máis que nunca, quere saber.

Xa non serven pequenas novas narradas en dous parágrafos. Cada vírgula conta.

E é ese o motivo polo que as novas de Teo ve hoxe a luz. Queremos ser o medio que lles conte aos teenses todo o que está agochado; o medio que lles ensine toda a diversidade que nos compón. E que non teña ningún tipo de límites.

Por iso escollemos a plataforma dixital, que nos permitirá adicarlle ás nosas novas o máximo espazo, para que ninguén perda o máis mínimo detalle do que aconteza na nosa vila.

as novas de Teo nace co compromiso de ser un medio riguroso, de calidade, e plural; e por iso lle deixaremos un espazo a todo aquel que queira expresarse nas nosas páxinas. E dende aquí, informaremos sen máscaras, nin filtros, de todo o que aconteza en Teo.

Esperamos que este camiño que hoxe comezamos a andar sexa longo, e que as novas de Teo chegue a ser o referente informativo da cidadanía teense, para a que traballaremos a esgalla; sen dúbida.

Invitámolos pois a que nos acompañen nesta andaina, na que ninguén nos vai calar, pese a quen lle pese, porque en as novas de Teo imos a loitar sempre pola verdade, pola xustiza, polo cumprimento dos dereitos humanos, e por unha sociedade mellor, e sen prexuízos.

Dámoslles a benvida, a as novas de Teo.

#editorial #teo #novas #opinión