Beatriz Calavia, primeira voceira do Círculo PODEMOS de Teo

/as novas de Teo/ Círculo PODEMOS Teo

A nova formación comeza así o seu proxecto para chegar a todos os teenses que queiran participar activamente na política do municipio

O Círculo Podemos de Teo celebrou o pasado día 18 unha asamblea aberta na que os participantes decidiron “comezar a traballar para chegar á xente do municipio que aínda non os coñece”. O Círculo teense ven arrastrando unha falta de participación cidadá dende o seu nacemento. Malia que son 76 as persoas inscritas no noso municipio, segundo os datos que aparecen na web oficial, só 5 persoas asistiron á última asamblea.

Entre os puntos que se acordaron, estivo o de non concorrer ao proceso municipalista da corporación, pero sí “formularse como ferramenta que traballe pola xente do Concello para que esta comece a implicarse na vida política”.

Con este fin, a formación escolleu por unanimidade a Beatriz Calavia, avogada e residente en Montouto, como primeira voceira do Círculo, cargo que ocupará de forma provisional debido a que este terá un carácter rotatorio. Outro acordo foi o de “iniciar conversacións coa xente do municipio para a creación dunha plataforma veciñal (virtual e física) onde se cree un espazo de comunicación, opinión e información entre a veciñanza, asociacións, agrupacións e demáis vida activa do Concello na que non só se debatan temas cotiás, problemas ou informacións, se non que tamén se poida chegar a tomar acordos en forma de documentos que logo poderían ser levados aos organismos correspondentes e mesmo á súa votación mediante algún tipo de consulta popular se fose preciso”.

Outra medida acordada foi a de dar a coñecer o Círculo, xa que as plataformas das que dispón a nova organización para publicitarse son escasas, e “as redes sociais e os medios electrónicos son os que poden facer máis doada unha labor que se entende complicada polo carácter rural do Concello na súa ampla maioría, con núcleos urbanos onde se concentra a maior parte da poboación”.

#concello #teo #podemos #círculo #política #formación #beatriz #calavia #voceira #representante