O PSdeG-PSOE de Teo propón a creación dun novo plan de igualdade

/as novas de Teo/ PSdeG-PSOE de Teo

A concelleira socialista, Uxía Lemus, presenta unha moción no Concello co fin de impulsar un novo Plan de Igualdade para Teo

Dende a corporación socialista sinalan o fin da vixencia do Plan de Igualdade que comezou en 2010 e permanecen á espera do informe final para coñecer os resultados obtidos e, con estes, elaborar propostas de actuacións futuras.

Mediante esta moción, os socialistas queren acelerar a creación dun novo Plan de Igualdade que debe "contribuír a sensibilizar á cidadanía na aplicación das políticas de igualdade así como a introdución da perspectiva de xénero en todos os ámbitos da vida municipal".

O PSOE de Teo alerta ademais dos recortes en políticas de igualdade que sofren os organismos deste ámbito e as organizacións de mulleres, o que está a provocar un incremento das mortes e denuncias por violencia de xénero. É por isto polo que os socialistas teenses cren que dende o Concello se deben facer "todos os esforzos posibles para que as políticas de igualdade sigan a ser un elemento fundamental da acción pública municipal".

A voceira municipal, Uxía Lemus, sinala que "non chega cunha prórroga tácita do Plan de Igualdade", e solicítalle ao Goberno local "a redacción dun novo Plan de Igualdade do Concello de Teo”.

#psdeg #psoe #concello #teo #igualdade #política #moción #plan #uxía #lemus