O Concello arranxa o derradeiro tramo da pista de Penelas

Este arranxo permitiu a instalación de dous colectores de recollida selectiva

O Departamento de Servizos Básicos de Teo ven de informar do arranxo do último tramo da pista de Penelas que estaba sen acondicionar. Trátase do treito que vén da zona do Raxó polo Portiño até a aldea de Penelas.

O asfaltado desta pista de monte foi una necesidade moi reclamada polos habitantes da zona, segundo informa o Concello. Sinalan, ademais, que o feito de que esta estrada sexa unha pista de monte, foi o motivo polo que a Xunta rexeitou construir a ponte de Penelas por riba da autovía que pasa pola zona.

As melloras desta vía, que tiveron un custo de 36.000 euros, realizáronse en dúas partes. Un primeiro treito de 700 metros, que se arranxou hai dous anos, e un segundo de 600 metros, que se rematou de arranxar nas últimas semanas. O concelleiro de servizos básicos, Xurxo Francos, sinala que ambos trazados "se arranxaron co mesmo tratamento, con rego asfáltico" e que "nestes días os operarios aínda dan os últimos remates nalgún punto por mor do mal tempo".

O concelleiro asegura ademais de que grazas a estas melloras permitirán o acceso do camión de recollida selectiva de lixo, co que se instalaron na zona dous colectores, un verde e outro amarelo.

#teo #concello #arranxo #penelas #pista #estrada #xurxofrancos #colector #lixo #euros