O PSOE de Teo reclamará no próximo pleno que se fagan melloras na urbanización dos Tilos

A concelleira socialista, Uxia Lemus, propón as melloras na urbanización despois dunha reunión cos veciños e veciñas da zona

Segundo sinala Uxía Lemus a través dun comunicado, “Os Tilos ten dous problemas principais: o abandono do mantemento das infraestruturas municipais e a inseguridade viaria”, polo que, no próximo pleno solicitaralle ao Concello información sobre as xestións realizadas ante o “reiterado estado de abandono” da parcela de reserva de equipamento, na rúa Bidueiro. Denuncia a edil socialista, que se trata “dunha finca chea de maleza e na que existe un galpón convertido nun refuxio de ratas”, o que supón “un claro risco para o transformador eléctrico”.

A corporación socialista pediralle tamén ao goberno municipal a colocación dunha varanda nas escaleiras que comunican a rúa Sabugueiro coa rúa Bidueiro, “empregadas frecuentemente por persoas con problemas de mobilidade” e preguntará ademais pola data de previsión do inicio das obras na rúa Carballo, que foron adxudicadas en setembro de 2014, xa que estas obras “responden á necesidade urxentísima de melloras na seguridade viaria da zona”. Sinalan dende o PSOE de Teo que “non se pode entender o retraso na execución das mesmas”.

Lemus aproveitará tamén a vindeira sesión plenaria para propor que tanto as obras municipais como as das empresas submistradoras do Concello se realicen ao mesmo tempo,“co fin de evitar as continuas aperturas de gabias nas rúas”.

Dende o PSOE de Teo avanzan que a concelleira socialista consultará ao goberno local sobre os “constantes problemas do alumeado municipal que afectan á rúa Carballo, na entrada da urbanización, así como á rotonda da rúa Bidueiro".

#psoe #psdeg #uxíalemus #teo #tilos #pleno #política #rúa #carballo #bidueiro