Os Xenerais da Ulla chegan a Reis esta fin de semana
- CULTURA | ENTROIDO | asnovasdeteo.com | Concello
- 7 feb 2015
- 1 Min. de lectura
A festa, na que participan case 200 persoas, comeza hoxe e estenderase durante toda a fin de semana
O Entroido dase cita esta fin de semana na parroquia de Reis, onde os coros e os Xenerais celebrarán a festa durante todo o sábado e o domingo. Este ano, segundo a organización, sairán 16 persoas a cabalo: dous abanderados abrindo a comitiva, catro correos e dez xenerais, que irán acompañando aos dous coros, o dos bonitos vestidos co traxe tradicional e outro de vellos.
Durante o día de hoxe, as comparsas sairán da aldea de Coira e irán pasando polo Freixeiro, Valiñas, Samar, Pazos, Montecelo, Piñeiro, A Freiría e A Ribeira. Mañá domingo, sairán pola mañá dende o Ferreiriño e pasarán por Chao do Río, Outeiro, O Calvario, A Ribeira, Olveira, Xermeade e Pontevea, onde os xenerais e os correos cruzarán a ponte entre as 17:30 e as 18:00 horas da tarde aproximadamente. Os percorridos rematarán no campo da festa, onde terán lugar os atranques á última hora da tarde.
Máis Entroido a vindeira fin de semana
A próxima fin de semana terán a vez a parroquia de Santa María de Teo, que celebrará o Entroido o sábado 14, e a parroquia de Cacheiras, que ao igual que Reis celebrará o Carnaval durante toda a fin de semana.
Comentarios