Uxía Lemus será a candidata socialista nas próximas Eleccións Municipais

Encabeza a lista co apoio unánime dos integrantes da Agrupación Socialista de Teo

Uxía Lemus recibiu onte, na asemblea celebrada na Mediateca do Grilo, o apoio unánime dos militantes socialistas para ser a candidata á alcaldía polo PSdeG-PSOE de Teo. Por primeira vez, a lista está encabezada por una muller, o que en palabras do PSOE de Teo reflicte “o seu compromiso coa igualdade”.

Os integrantes da lista socialista nas vindeiras eleccións municipais serán Uxía Lemus; Roberto Moñino; Mayte Argibay; Enrique Durán; María Rosa Aneiros; Nisar Maarawi; Fina Angueira; Daniel García Dios; Fina Martínez; Manuel Díaz Mato; Balbi Gonzalez; Jaime Rodríguez Ouro; Josefa Costa; Antonio Carreira; Suca Lavín; Juan Carlos Corcoba; e pechando a lista de titulares, Pilar Vázquez. Como suplentes, Manolo Rey e Zora L. Barcia. O PSOE de Teo quere destacar con estes nomes a súa "gran renovación" e salientan, ademais, a presencia de "importantes militantes históricos" na mesma.

O PSOE teense quere presentar con esta lista un “proxecto alternativo fronte ao modelo de desidia e desleixo do actual goberno municipal de Martiño Noriega e Rafael Sisto”. Segundo indica Lemus, “gobernar non é ir a remolque das novas dos xornais, é ter un proxecto, unha idea de futuro, que pasa por unha planificación no mantemento e creación das infraestruturas, por escoller un modelo de concello, sen limitarse á mera xestión conxuntural, e por ser escrupuloso na xestión do público".

A candidata socialista á alcaldía

Uxía Lemus ten 38 anos, e é Doutora en Ciencias Políticas pola Universidade de Santiago e funcionaria no Concello de Oroso dende o ano 2007. Ademais, Lemus leva 4 anos como Concelleira en Teo polo PSdeG – PSOE.

#política #psdeg #psoe #teo #candidata #muller #socialista #alcaldía #doutora #asemblea