"As Fillas Bravas" de Chévere visitan Calo este domingo

A representación desta produción de Chévere será o vindeiro domingo 22 ás 18:00 horas da tarde no local da S. R. de Calo

"As Fillas Bravas" visitan este domingo Calo. Elas, son tres mulleres que tocan e cantan o que lles peta, como antes fixeron a súa nai e o seu pai, porque todas son fillas do vento, mulleres de andar a pé do toxo, orgullosas de vir de tras da silveira, cantoras dunha estirpe de voces furtivas que berran entre raposos. Así describe o Grupo Chévere a estas tres mulleres, interpretadas por Patricia de Lorenzo, Mónica García e Arantza Villar.

Este espectáculo, que vai destinado a tódolos públicos, é resultado dun traballo de investigación sobre o tratamento de temas como a sexualidade, as relacións de xénero e os roles da muller na sociedade tradicional que aparecen reflexados nas coplas do cancioneiro popular galego, publicadas dende a segunda metade do século XIX.

A obra será representada este domingo 22, ás 18:00 horas da tarde, no local da Sociedade Recreativa San Xoán de Calo, sito ao carón da Igrexa de Calo. A entrada será de balde.

#chévere #asfillasbravas #cultura #teatro #muller #calo