José Manuel Guerra trata coa deputada nacional Marta González as melloras na N-550 ao seu paso por T

O voceiro popular reuniuse coa deputada para continuar coas xestións iniciadas para pór en coñecemento do Ministerio de Fomento as necesidades do vial

A pasada fin de semana, José Manuel Guerra reuniuse con Marta González, deputada nacional. Neste encontro, o candidato polo PP para as eleccións municipais, continúa “facendo as xestións oportunas para procurar que Fomento mellore a N-550 ao seu paso por Teo” xa que, aseguran dende o PP de Teo, "a estrada que parte do Milladoiro en dirección Padrón, precisa de certas actuacións que melloren a seguridade viaria e a fluidez do tráfico". Esta vía conta con máis de cinco quilómetros en total e percorre os lugares de Galanas, Fixó, Balcaide, Casalonga, Ameneiro e Francos.

Aínda que xa se informou aos responsábeis de algúns dos problemas neses lugares, como o do cruce do Espiño, o PP considera importante que se atendan as demais zonas, pois “especialmente nos lugares de Balcaide, Casalonga e Ameneiro, máis dun centenar de empresarios do comercio da zona, informaron do prexuízo que supón para moitos deles a existencia dunha permanente liña continua na estrada, o que impide a viraxe das persoas que queren comprar”.

Dende o PP conclúen con que “dende a administración local non se fixo todo o posible para procurar as melloras das principais vías que percorren o Concello” e lamentan que “a maior acción que leva a cabo o Concello sexa mandar unha carta a Fomento”.

#política #ppdeteo #concello #fomento #estrada #martagonzález #deputada #espiño #carta #n550 #vial #josemanuelguerra