Rafael Sisto determinará no próximo pleno a súa responsabilidade na anulación parcial do PXOM de Teo

No pasado pleno de xaneiro a concelleira socialista, Uxía Lemus, sinalou cales eran os puntos que debían ser tratados polo Concelleiro de Urbanismo

Tras as peticións do grupo socialista de Teo, o Concelleiro de Urbanismo dende o ano 2007, Rafael Sisto, comparecerá no próximo pleno, que se celebrará mañán, para explicar cal é o seu grado de responsabilidade na redacción e na tramitación do Plan Xeral de Ordenación Municipal (PXOM) de Teo.

O Plan foi aprobado no ano 2010 cos votos do PP, IN-Teo e o BNG, liderado entón por Sisto e Martiño Noriega. A súa anulación parcial é un procedemento da administración urbanística, considerándoo “manifestamente ilegal” segundo unha sentenza do Tribunal Supremo ditada en decembro de 2014.

A candidata do PSOE para as eleccións municipais, Uxía Lemus, solicita tamén ao concelleiro que explique “a contradición entre a felicitación pública aos veciños demandantes pola sentenza e o feito de que o Concello estivera a pagar avogados para que, tanto ante o Tribunal Superior de Xustiza de Galicia como ante o Tribunal Supremo, defenderan o contrario do solicitado por eses mesmos veciños”.

Dende a formación socialista tamén instan a Sisto a aclarar a súa posición na situación do polígono de Montouto e o viario entre Cacheiras e Calo, anulado polo Supremo, concretando “en que momento deixou de defendelo, cando hai documentos que acreditan que era a súa prioridade urbanística" e tamén preguntarán por "cal será o futuro dese solo, agora sen regulación normativa”.

Uxía Lemus sinala que “esta comparecencia de Sisto responde á sentenza demoledora do Tribunal Supremo, que indica as irregularidades na tramitación dun PXOM que foi aprobado co seu voto no ano 2010", e indica que "o concelleiro se remitiu á herdanza de Armando Blanco, como se el non fose concelleiro de Urbanismo desde o ano 2007”.

#psoe #rafaelsisto #urbanismo #pxom #política #uxíalemus