Rafael Sisto será o candidato á alcaldía por ANOVA

Sisto substitúe deste xeito a Martiño Noriega, que deixa o goberno de Teo despois de oito anos

Cunha listaxe aínda por definir, Rafael Sisto (á dereita da imaxe) encabezará a candidatura de ANOVA nas vindeiras eleccións de maio, seguido por Salomé Beiroa e Ignacio Iglesias, actual Concelleiro de Benestar Social e Igualdade. Ademais, entre outros postos de saída estarán Xurxo Francos, actual Concelleiro de Servizos Básicos e Mocidade, e María Garea, actual Concelleira de Educación. Entre as baixas máis notábeis, estará Anxo Rey, actual Concelleiro de Desenvolvemento Local, quen non repetirá na listaxe.

O aínda número dous de ANOVA Teo afronta estes comicios con "esperanza", xa que está "orgulloso do traballo desta forza de goberno" e da "honestidade" do seu equipo político, algo do que, segundo Sisto, "a cidadanía xa é consciente".

Entre os retos que afrontará o equipo de Rafael Sisto, estarán o "avanzar na participación veciñal" e o "desenvolvemento do polígono industrial de A Ramallosa".

Rafael Sisto pecha as candidaturas á alcaldía de Teo

Rafael C. Sisto Edreira é natural de Luou (Teo), naceu no 1963 e está licenciado en Ciencias Químicas e doutorado en Ciencias da Educación pola Universidade de Santiago de Compostela. Profesor de Ensino Secundario, Rafael Sisto complementa o seu traballo coa investigación no campo da Historia da Ciencia en Galicia e co deseño de exposicións de divulgación científica.

Ademais, forma parte do grupo 'Ramón María Aller' do Seminario de Estudos Galegos. Iniciou a súa actividade política como membro do claustro constituínte da Universidade de Santiago, traballando politicamente no BNG ata o ano 2012, momento no que abandona a formación. Continúa formando parte do grupo de goberno dende 2007 e actualmente milita en Anova.

#rafaelsisto #alcalde #teo #alcaldía #eleccións #2015 #municipais #anovateo