O PSOE teense invita á cidadanía a construír Teo

A xuntanza emprazarase este venres na Mediateca do Grilo, en Cacheiras, ás 20:30 horas

Dende a formación de Uxía Lemus, organizan esta reunión co fin de que os veciños e as veciñas de Teo expoñan as súas inquedanzas e formulen propostas en relación co presente e o futuro do municipio, o que para os socialistas é "un paso máis da acción política do PSOE de Teo destes 4 anos, traballo que é a base do programa para as eleccións municipais de maio de 2015".

Ademais, segundo Lemus, o equipo socialista está a desenvolver un proxecto que está baseado en dous eixes, como son por un lado "as necesidades individualizadas das parroquias" e por outro "unha estratexia de concello, a medio e longo prazo".

Aseguran dende o PSOE teense que durante estes anos "non houbo nin un estudo nin planificación das actuacións por parroquia nin un proxecto de futuro", e critican os gobernos de Armando Blanco e de Martiño Noriega por facer só "unha política de reacción".

O equipo socialista de Teo defende que se instaure dende a administración local "un modelo propio de crecemento socieconómico que debe ser froito do consenso cidadá", co fin de dar resposta "ás necesidades dos teenses" e rematar así con situacións como o desemprego no sector servizos, xa que dos 1.539 parados do municipio, o 64% pertencen a este ámbito.

#teo #psoe #lemus #xuntanza #blanco #noriega #socialista #mediateca #política