O CSC A Ramallosa acolle o musical "aXente Corrente, Galo Mirindolo"

O Concerto celebrarase mañá, sábado 7 de marzo, ás 18:00 horas no Centro Sociocultural A Ramallosa

Este musical está baseado nun programa didáctico sobre educación viaria no que traballaron alumnos de terceiro e cuarto curso de primaria dos colexios teenses. Agora, este musical proponse para rapaces e rapazas de 8 anos e público familiar.

Ademais, María Álvarez Garea, concelleira de Educación, destaca que dende a Concellaría “buscamos unha actividade para traballar sobre a seguridade viaria cos centros, e este ano o libro cd A Xente Corrente e o concerto co que se presenta pareceunos unha moi boa alternativa, lúdica e dinámica, para achegar este tema aos máis pequenos/as”.

Entre os obxectivos do programa de educación viaria, Garea insiste en que se "pretende dar responsabilidade ao neno/a dentro do vehículo e nas vías públicas, reforzar conceptos de educación viaria, recoñecer elementos da linguaxe de tráfico ou adquirir bos hábitos referidos á circulación".

Dende o Concello, informan de que a entrada será de balde pero agradecen, como vén sendo costume, que os asistentes fagan unha contribución ao banco veciñal de alimentos, mediante produtos non perecedoiros, entre os que salientan o leite e conservas.

#concelloteo #teo #axentecorrente #cscaramallosa #educación #cultura #galomirindolo