Comeza o prazo de inscrición para a Carreira Pedestre Batalla de Cacheiras 2015

O Concello de Teo informa da apertura do prazo de inscrición para a Carreira Pedestre Batalla de Cacheiras 2015 que este ano se celebra o domingo 19 de abril con saída e meta no CEIP A Ramallosa

Segundo informan dende o Concello, o prazo de solicitudes para participar nesta carreira estará aberto até as 22.00 horas do 15 de abril para todas as categorías e debe realizarse, unicamente, mediante este formulario web. O consistorio informa de que tamén, dende esta páxina, se pode visualizar o regulamento da carreira.

A carreira absoluta terá un percorrido de aproximadamente 11 quilómetros e nela participarán as categorías júnior, promesa, sénior e veterano. A saída desta proba será ás 12:10 horas. As categorías infantil, cadete e xuvenil cubrirán un circuíto de 3.500 metros. As carreiras comezarán coas categorías dos máis cativos. Os primeiros en tomar a saída serán os pitufos (nados no 2010 e posteriores) que correrán 200 metros. A continuación os prebenxamíns (nados no 2008 e 2009) cubrirán 500 metros, para seguir os benxamíns (nados no 2006 e 2007) que correrán 1.000 metros e pecharán esta parte os alevíns (nados nos anos 2004 e 2005) tamén con 1.000 metros.

En canto ao custo de inscrición, as categorías pitufos, prebenxamín, benxamín, alevín, infantil, cadete e xuvenil, son gratuítas, mentres as demais teñen un custo de 4 euros por participante.

A recollida de dorsais realizarase entre as 9:30 e 10:30 horas na secretaría da competición, sita no pavillón Ezequiel Mosquera, e ademais haberá premios para os 3 primeiros clasificados das categorías establecidas (en mulleres e homes), as 3 primeiras mulleres e os 3 primeiros homes da carreira absoluta (JÚNIOR/ PROMESA, SÉNIOR e VETERANOS/AS A/B/C), o/a participante máis novo/a e o/a máis veterano/a que logre concluír a proba polos seus propios medios e sen axudas externas, o primeiro equipo federado clasificado na clasificación final, o centro escolar que achegue máis participantes que logren concluír a proba e o/a primeiro/a clasificado/a de Teo en cada categoría (deberán reflexar a localidade na inscrición).

#deportes #pedestre