O Concello presenta a oferta de campamentos de verán 2015

Existirán dous campamentos diferentes. Un infantil, para rapaces entre 7 e 11 anos, e outro campamento xuvenil para mozos e mozas de entre 12 e 16 anos

O Concello de Teo ven de informar da oferta de campamentos de verán para este ano. O prazo para apuntarse no campamento infantil estará aberto dende o mércores 15 até o mércores 29 de abril. A listaxe de persoas admitidas publicarase o vindeiro 6 de maio e o consistorio informa de que, en caso de resultar admitido, se debe facer o pago do custo do campamento, que se cifra en 100 euros, entre os días 1 e 15 de xuño. O campamento infantil levarase a cabo entre o 17 e o 26 de agosto, no albergue de Santa Cruz de Oleiros. Este campamento conta con 103 prazas.

En canto ao campamento xuvenil, o prazo de inscrición estará aberto dende o 20 de abril até o 4 de maio, ambos incluídos. A listaxe de admitidos publicarase a partir do 8 de maio e as persoas admitidas deberán facer o ingreso do custo do campamento, tamén de 100 euros. O campamento xuvenil levarase a cabo entre os días 3 e 12 de agosto, no albergue de Santa Cruz de Oleiros. Este campamento conta con 49 prazas.

O Departamento de mocidade informa tamén de que a reserva de prazas se fará por rigorosa orde de inscrición e sinala que en cada campamento hai cinco prazas reservadas para emerxencias sociais. Ademais, o venres 12 de xuño, ás 20:00 horas, celebrarase no Salón de Plenos do Concello unha reunión informativa sobre o desenvolvemento desta actividade.

#política #concello