O IES Cacheiras crea unha horta ecolóxica

O Concello colabora nun proxecto de humanización do instituto colocando mesas e bancos nas zonas verdes

O Instituto de Educación Secundaria de Cacheiras, está a desenvolver un programa de humanización das súas zonas verdes, co fin de "convertilo nun espazo de convivencia, a través dun proxecto coeducativo que podería combinar enfoques diferentes como o ambiental, o deportivo, o artístico e o educativo en xeral”.

Para isto, membros do IES crearon unha horta ecolóxica, que ten varios obxectivos que van dende "desenvolver a sensibilización ante as distintas problemáticas ambientais, desenvolver capacidades de planificación e resolución de problemas, fomentar o traballo en equipo, traballar valores como a autonomía e a solidariedade ou fomentar actitudes positivas cara o consumo responsable e sostible".

Ademais, dende o Concello informan da súa contribución a este plan coa instalación de dúas mesas con bancos na zona onde está ubicada a horta ecolóxica.

Varios alumnos e alumnas xa comezaron a plantar fresas nesta horta ecolóxica, preto da que tamén se creou un espazo no que se plantaron arbustos e flores ornamentais.

#educación