Ruth Lorenzo Couso acada o cuarto posto na Copa Intercontinental

Ruth Lorenzo Couso, karateca do San Francisco Teo, obtivo un meritorio cuarto posto na segunda edición da Copa Intercontinental Feminina

Esta segunda edición da competición celebrouse en Madrid a pasada fin de semana e que reuniu a gran parte das mellores karatecas nacionais e internacionais de categoría absoluta.

Segundo informan dende o Club San Francisco Teo, a competición contou coa participación de karatecas españolas e karatecas procedentes de Exipto, Turquía, Túnez, Marrocos, Serbia, México, Andorra, Suiza e Francia.

Na xornada do sábado, celebrada na localidade de Leganés, Lorenzo clasificouse entre as oito mellores da categoría de -55 kg., malia que unha derrota ante a exipcia Yassmin Hamdy, campioa da categoría, relegouna á loita polo bronce ante a ibicenca Cristina Ferrer, medallista no pasado campionato de Europa e membro da selección española.

O combate polo bronce celebrouse o domingo no Palacio de Vista Alegre de Madrid ante un bo número de afeccionados. Ruth Lorenzo plantoulle cara a unha rival moito máis experimentada que finalmente a deixou ás portas da medalla de bronce. Malia este derrota, o balance que fan dende o Club "é moi positivo xa que a xoven karateca do San Francisco continúa coa súa traxectoria ascendente e co firme propósito de ocupar lugares de privilexio nesta competición a curto prazo".

A outra participante teense na competición, Nerea Bellido Echebarrieta, tivo tamén unha destacada actuación clasificándose entre as oito mellores da súa categoría (+68 kg.), aínda que non obtivo o pase á xornada do domingo na que se loitaba polas medallas.

#deportes