Aspamite celebra os seus 20 anos mostrando a súa grande capacidade de superación
- ASOCIACIÓNS | MLC
- 20 abr 2015
- 2 Min. de lectura
Aspamite celebrou onte, domingo 19 de abril, a gala do seu XX aniversario
Arroupados por un auditorio cheo, a gala comezou cunha curtametraxe que gravaron e editaron varios alumnos do IES Cacheiras na que se podía ver aos membros de Aspamite preparando o escenario para a súa gala de aniversario. En clave de humor, os usuarios da asociación ían colocando o sofá e o decorado para o evento.
Despois da curtametraxe, entraron en escena Xesús Ron e Patricia de Lorenzo, membros de Chévere, a compañía de teatro residente en Teo e gañadora do Premio Nacional de Teatro. Ron e Lorenzo presentaron a gala do XX aniversario de Aspamite, e ademais entrevistaron ao seu presidente, Ángel Morón, quen falou dos obxectivos da asociación a curto prazo, entre os que salientou a creación do novo centro de Aspamite.
Ademais, tamén se entrevistou a Ana González, educadora social e coordinadora do programa de igualdade de oportunidades e inclusión social Hefesto da Casazul, programa do que tamén se proxectou un documental no que quedaba patente o afán de superación e motivación de xente como a que forma Aspamite.
Finalmente, Xesús e Patricia entrevistaron a Rosario Carbia Eiras, nai de Cristina Andújar, unha das usuarias do centro ocupacional de Aspamite, para dar paso seguidamente á proxección do documental "Discapacidade non é incapacidade".
O documental, filmado por Pilar Iglesias e Fabián Gegunde, alumnos da Universidade de Santiago de Compostela, mostraba o proxecto, paso por paso, da reforma do centro da asociación. Os usuarios ían recoñecendo os materiais cos que logo traballarían, asistían a clases de bricolaxe, e mesmo viaxaban até un centro comercial a mercar os materiais cos que reformar a súa segunda casa. Os usuarios de Aspamite quixeron deixar patente no documental o seu grande esforzo de superación, "somos capaces, podemos facer cousas útiles e proveitosas igual que a demais xente", xa que moitas veces son os seus pais e a xente do seu contorno, quen os infravaloran.
"Con axuda podemos saír adiante, aínda que teñamos dificultades".
Комментарии