Este sábado celébrase a fase final do II Certame de Canción de Autor en Galego

O II Certame de Canción de Autor en Galego 'Concello de Teo' celebra a súa gala final este sábado día 25 de abril ás 20:00 horas no CSC A Ramallosa

Esta derradeira fase do concurso contará con 8 finalistas de “grande calidade”, tal e como afirma o director artístico do dito Certame, Xoán Curiel. A cita será ás oito do serán no Auditorio da Ramallosa e a entrada é de balde. Ademais, o público terá un papel moi importante, xa que será quen outorgue o accésit á mellor canción e á/ao mellor artista.

Na gala, os oito finalistas: Sofía Espiñeira, Laura Iglesias, Noé Subiela, Isis, Pilar Martínez, Lucía da Fonte, Sandra Tenreiro e Umbra, disporán de oito minutos para defenderen a súa actuación, estilo e calidade.

Desde a organización animan a calquera persoa interesada a se achegar á xornada decisiva do concurso, que se converterá nunha "festa da música e a palabra". A gala terá unha duración aproximada de dúas horas.

O premio ao gañador ou gañadora será, entre outros, a gravación dun EP. Ademais, a vencedora ou vencedor disporá dunha serie de concertos e de promoción na prensa. Tanto para os que chegaron á final como para os que non, Xoán Curiel mostra a súa "satisfacción" porque estes traballos "serviron para visibilizar os e as creadoras noveis do noso país".

#cultura