Grandes resultados para o karate teense no Campionato Galego de Clubs

O club de Teo foi un dos máis destacados na competición cun balance final de dous ouros, unha prata e dous bronces

O pasado domingo 19 de abril celebrouse na localidade de As Pontes o Campionato Galego de Clubs, no que participaron karatecas do San Francisco Teo.

O papel dos karatecas do club teense foi dominante, conseguindo cinco das oito medallas posibles. O club participou dentro das modalidades de kumite e na categoría cadete – junior, tanto con equipos femininos como masculinos.

Salientaron as medallas dos equipos femininos, onde o equipo formado por Ana Belén Lobato, Silvia Lobato e Elvira Vilá rematou o campionato coa medalla de ouro tras enfretarse ás súas compañeiras Isabel San Martín, Andrea García e María Moure, que conseguiron a prata.

Por outra banda, o equipo composto por Paula Garabatos, Paula Caramazana e Andrea Fandiño obtivo a medalla de bronce.

Pola súa parte, o equipo cadete – junior masculino conseguiu outras dúas medallas máis para o club teense, da man do equipo formado por Xavier Santos, Santiago Nande e Jacobo Veiga, que obtiveron o ouro nunha emocionante final co ESK de Narón e pola parte do grupo integrado por Gonzalo Veiga, Lucas Febrero e Pablo Ferradás, que culminaron a competición cun terceiro posto.

#deportes