"A trabe de Ouro" presenta o seu número 100

O director da publicación, Xosé Luís Méndez Ferrín, o editor, Olegario Sotelo Blanco, o membro do Consello de Redacción, Francisco Fernández Rei e o alcalde de Teo, Martiño Noriega Sánchez participaron no acto de conmemoración do número 100

O pasado xoves 23, ás 20:30 horas, presentouse na Mediateca do Grilo, en Cacheiras, a publicación número 100 da revista de pensamento crítico "A trabe de Ouro".

No número cen, que corresponde aos meses de outubro, novembro e decembro de 2014, a revista ofrece colaboracións conforme ao seu formato habitual, incluíndo ensaios de pensadores relevantes xunto con investigacións sobre diversos temas, e en concreto, referidos a diferentes aspectos da cultura galega.

Nesta ocasión, "A Trabe de Ouro" inclúe no seu inicio artigos de Alain Badiou ou Edwar W. Said canda un achegamento á figura de Luís Iglesias de Manuel R. Bermejo, e mesmo a publicación de aforismos inéditos de Otero Pedrayo por Manuel Outeiriño. Xosé Luís Méndez Ferrín, director da publicación, escribe nesta publicación tan especial o artigo “O Padre Feixóo e o conflito ideolóxico no Ourense decimonónico”.

#cultura