O Concello denuncia que a Xunta de Galicia lle denega as solicitudes de cursos de formación a desemp

O equipo de goberno emite un nota de prensa ante as acusacións do Partido Popular, que aseguran que dende o Concello "nunca se solicitaron obradoiros de emprego durante a presente lexislatura"

Segundo informan dende o Concello, "as políticas de emprego dos últimos anos do PP no goberno do Estado e na Xunta de Galicia levounos a que Galicia sexa unha das rexións europeas cunha taxa de paro superior á media, e aquí que dende comezos de ano se destruiran máis de 12.000 postos de traballo".

Conscientes de que este é o problema máis grande ao que se enfrontan as persoas, o grupo de Goberno local informa de que se realizaron "tres solicitudes de accións formativas dirixidas a traballadores e traballadoras desempregados, sendo desestimadas pola Xunta de Galicia".

A última destas solicitudes, segundo o consistorio, do ano 2012, consistía en dúas propostas: "recepción en aloxamentos, e Operacións básicas de pisos en aloxamento". A proposta incluía "a utilización das instalacións do Hotel Congreso en réxime de alugueiro. Mais, como as anteriores, foi denegada".

Dende a corporación municipal denuncian que sexa o Partido Popular quen acuse ao Concello de Teo da alta taxa de desemprego, cando "foi o PP quen utilizou a desesperación da xente pola falta de traballo para facer que sexa legal traballar todas as horas que queiran as empresas por 650 euros".

Ademais, dende o grupo de goberno critican que "durante a campaña electoral, o PP de Teo non ten tempo para contrastar os datos e cren o conto que lles conta a Concelleira de Traballo, que o único que fai é botar balóns fóra".

Así mesmo, dende o consistorio, reclaman que o Partido Popular de Teo "asuma a súa parte na desfeita do desemprego, no Estado en xeral e en Galicia en particular".

#política