O PP de Teo facilitará a incorporación da mocidade á actividade agraria

Esta acción estará enmarcada no plan integral Emprega Teo, a través do cal se asesorará ás persoas desempregadas e se apoiará a creación de novas empresas

O líder dos populares de Teo, José Manuel Guerra, mantivo recentemente unha reunión coa Conselleira de Medio Rural, Rosa Quintana, onde analizaron as posibilidades reais que teñen os mozos emprendedores para colocar no mercado os produtos hortícolas que poden producirse nos campos teenses, no marco da actual conxuntura de altísima demanda dos produtos da horta galega polos grandes distribuidores de alimentos e as cadenas de supermercados.

O modelo, segundo os populares, xa ten un precedente de éxito en Teo, onde unha pequena explotación de Oza, especializada en produtos de alta cociña, "resulta ser un referente a seguir".

Segundo o PP de Teo, a Consellería "facilita á mocidade as condicións para a súa incorporación á actividade agraria, mediante diferentes liñas de axudas específicas destinadas a persoas de entre 18 e 39 anos así como outras dedicadas á modernización das explotacións".

Entre as súas prioridades programáticas, José Manuel Guerra desenvolverá o Plan Integral Emprega Teo, no que se fomentará a participación, formación e emprego da mocidade. A través del, cada persoa que queira participar, terá á súa disposición un itinerario individual, integral e adaptado ás súas necesidades, expectativas e nivel de formación.

Este programa de emprego xuvenil, segundo a formación popular, "pretende asegurar que todas as persoas mozas poidan facer prácticas profesionais en empresas locais, unha vez rematen os seus estudos, coa finalidade de adquirir experiencia e maior competencia".

#política