Os d'Abaixo actúan este sábado no auditorio da Ramallosa

O grupo musical ofrecerá este sábado un concerto no auditorio da Ramallosa, a partires das 22:30 horas

Os d’Abaixo apareceron no ano 2010 co obxectivo de promover e animar bailes e festas tradicionais na contorna de Santiago de Compostela. O seu repertorio recolle algunhas das pezas populares máis coñecidas da música galega xunto con novas achegas de fontes tradicionais ou de nova composición.

Este grupo musical galego quere ofrecer unha escolma de música cargada de forza e enerxía que leve ao baile e á foliada ao xeito de antes. Son un grupo no que se atopa xente que toca por afección e leva toda a vida vencellada ao folclore galego, xunto a músicos profesionais de gran traxectoria en bandas como Berrogüetto ou Fía na Roca.

Os d'Abaixo está formado por Richi Martín (percusión), Xacobe Varela (gaita, bouzouqui e voz), Xosé Ramón Vázquez (acordeón), Gonzalo Goas (guitarra acústica e voz), Quim Farinha (violino) e Roberto Rama (gaita, saxofón e low whistle).

No concerto, que terá lugar o vindeiro sábado 9 ás 22:30 horas no auditorio da Ramallosa, o grupo presentará os temas do seu primeiro disco "Ao vivo en Lorient". A entrada ao concerto é gratuíta.

Aquí podes escoitar "Mazurca dos Campaneiros", de Os d'Abaixo:

#cultura