José Manuel Guerra alega "problemas de axenda" para participar noutro debate

O candidato do PP á alcaldía de Teo xustificou a súa ausencia no debate emitido en Santiago TV debido a "problemas de axenda"

Segundo a moderadora do debate de Santiago TV, Silvana Moril, o candidato popular José Manuel Guerra foi avisado con tres semanas de antelación do debate que tería lugar onte, xoves 7, no hotel Puerta del Camino. Conforme comentaba ao inicio do programa a moderadora, Guerra xustificou a súa ausencia debido a "problemas de axenda".

Por outra banda, tanto Uxía Lemus, candidata do PSdeG-PSOE de Teo, como Rafael Sisto, candidato de SONdeTEO-ANOVA, manifestaron mediante as súas contas de Facebook que o PP de Teo lle propuxo á cadea de televisión substituír a figura de José Manuel Guerra pola de Antonio Reyes Sánchez Crespo, número dous da candidatura popular. Mais Santiago TV non aceptou o troco.

Esta ausencia do candidato popular súmase á súa negativa a participar no debate público, proposto por Lemus, entre os catro candidatos á alcaldía de Teo e aberto ás preguntas dos cidadáns.

#política