"Don't worry, be hippie", chega a Calo a sexta edición do Galicia Woodstock

Nesta edición, o Galicia Woodstock celebrarase no Campo de San Domingo, en Calo, e doará parte dos beneficios do aparcadoio ao Bando de Alimentos de Teo

Galicia Woodstock "non é un festival máis", é o Festival da Música, a Paz e o Amor. Así describen dende a organización este festival que se fai sostible grazas á axuda de moita xente e que se autoxestiona coa colaboración de voluntarios/as, músicos, técnicos e sobre todo "moita ilusión e esforzo". Para a organización do evento, “chegar a esta sexta edición do festival, custou moito e moitas ilusións, esforzos, recursos e xente que quedou polo camiño" e por iso pensan que é importante intentalo, xa que a tanto esforzo, lle chega a súa recompensa".

A entrada ao festival será de balde e a organización anima ao público a consumir os produtos que se ofertan dentro do evento, para así axudar á financiación do mesmo e a contribuír ao Banco de Alimentos de Teo.

Durante hoxe, venres 12, e mañá, sábado 13, o Galicia Woodstock contará cun recinto habilitado para a acampada libre, contará con centos de músicos amateurs e profesionais, haberá un mercado de artesanía e celebraranse vodas hippies. O evento contará ademais cun parking de pago cuxos beneficios, en parte, serán doados ao Banco de Alimentos de Teo.

#cultura