Oh Trío pon o punto final desta edición de Música nos Tilos

Este ciclo de concertos íntimos e de proximidade, que teñen lugar na Casa Común dos Tilos, concluirá ás 22.30 horas deste venres 26 de xuño

Despois das actuacións de Xacobe Martínez Antelo Trío e Caxade, chega o turno esta semana de Oh Trío, quen poñerá o peche a esta edición da mostra musical.

Oh Trío é un grupo de jazz tradicional que está formado por Antonio Bravo á guitarra, Germán Díaz na zanfona, na caixa de música e no serrucho musical e Diego Martín na batería. Os integrantes desta formación, que xa se coñecían e colaboraban en diversas formacións desde había anos, non decidiran até o 2008 reunirse como grupo musical. Dende ese momento, comezaron a realizar xiras por multitude de países e os seus traballos discográficos foron premiados en diversas ocasións por revistas de alcance internacional.

Os concertos de Música nos Tilos están organizados polo Concello de Teo e contan co apoio da Deputación da Coruña para o seu financiamento. Dende o consistorio animan aos asistentes a facer achegas para o Banco Municipal de Alimentos, en especial de víveres non perecedoiros.

#cultura