Música, actividades e artesanía na "Feira da Terra"

A Feira da Terra terá lugar este domingo 28 de xuño na carballeira de San Martiño en Francos, na parroquia de Calo

Durante o próximo domingo, desenvolverase no lugar de Francos a terceira edición da Feira da Terra, promovida pola Asociación A Carballeira e coa colaboración do Concello de Teo. Esta feira tratará de ser “un espazo de intercambio de ideas, de compravenda de productos e de actividades”, cun mercado que estará aberto dende a media mañá e no que poderán mercarse produtos da horta, de alimentación, restauración ou artesanía.

Durante a feira tamén terá lugar unha xornada de lecer, con charlas e obradoiros sobre alimentación, restauración, horta e xogos tradicionais, ademais de contar coas actuacións do grupo A Rexionalista, os percusionistas de Os Fóndaos do Pífaro e Ce Orquestra Pantasma, quen amenizarán a xornada coa súa música.

Por último, entre outras actividades, os asistentes á feira, poderán disfrutar do bautismo hípico grazas á colaboración da escola de equitación do Centro Hípico Haras de Compostela.

#cultura