O BNG de Teo denuncia a tardanza dos medios aéreos de extinción para atender o incendio forestal de

O BNG de Teo vén de denunciar a tardanza en aparecer dos medios aéreos de extinción para atender o grave incendio forestal que afectou onte ás zonas de Texexe e Mouromorto, mesmo cunha situación de grande perigo para a zona.

Dende o Bloque teense salientan que "o lume iniciouse sobre as cinco da tarde, mais os primeiros medios aéreos non apareceron ate as oito da tarde, tres horas despois, e cando xa se queimaran 12 hectáreas de terreo arborado moi próximo ás vivendas".

Ademais desta tardanza dos medios aéreos, desde o BNG de Teo denuncian tamén a escaseza de medios terrestres, que acudiron tamén con atraso e en escaso número, o que impediu que se puidera controlar o lume moito antes do que se fixo, sendo aínda máis grave ao situarse este incendio moi perto de zona habitada, e afectando finalmente a máis de 20 hectáreas.

Para o BNG de Teo estes feitos son "un signo da mala planificación que desde a Consellaría do Medio Rural e do Mar se ten feito da campaña anti-incendios, e en vista de que inda nos atopamos no mes de xuño, é moi probábel que volvamos vivir situacións coma a de hoxe se non se corrixen as deficiencias de planificación e número de medios”, algo que os nacionalistas lle esixen á Xunta.

#política