A xestión municipal da auga podería comezar no mes de outubro

Segundo manifestou o alcalde, Rafael Sisto, durante o pasado pleno extraordinario, o Concello podería comezar a xestionar o servizo da auga e depuración durante o último trimestre do ano

Durante a tarde do luns 6 de xullo tivo lugar a celebración dun pleno extraordinario no que se debatiron e aprobaron os aspectos con máis trascendencia do proceso da municipalización do servizo de xestión e abastecemento da auga en Teo.

Un dos primeiros puntos tratados neste pleno extraordinario foi a aprobación do regulamento das taxas do abastecemento, medida que se aprobou cos votos a favor de Anova, PSdeG e BNG. O PP votou en contra ao considerar estas taxas como "excesivas".

De seguido tivo lugar a aprobación da memoria técnica do proceso de municipalización cos votos a favor de Anova, PSdeG e BNG. Pola súa parte, o Partido Popular tamén votou en contra".

Para rematar, procedeuse á votación relacionada co cadro de persoal do servizo da auga, un dos puntos máis delicados do proceso da municipalización. Este asunto foi aprobado grazas ao voto de calidade da alcaldía, xa que o BNG e o PSdeG se abstiveron mantendo a posición exercida durante a anterior lexislatura. En canto á formación de José Manuel Guerra, volveu a opoñerse á medida sinalando que este proxecto "xa fai augas mesmo antes de comezar".

Rafael Sisto, alcalde de Teo, recurriu aos informes elaborados pola intervención e a secretaría para aprobar a medida relacionada co cadro de persoal. Ditos informes sinalan que os traballadores de Viaqua non podería ser subrogados polo Concello xa que sería unha medida ilegal.

Dende o momento en que comece o proceso de selección do novo persoal, os traballadores da empresa poderán presentar un recurso que obrigará ao Concello a readmitilos mentres non exista unha sentencia firme do xuíz, momento no que o goberno local poderá sacar a oposición todos os postos de traballo ou ben subrogar aos actuais traballadores, en consecuencia á resolución xudicial.

#política