Estefanía Ojea representará a Galicia no Campionato Europeo de Fútbol Americano

A deportista galega competirá co Equipo Nacional Femenino durante o próximo mes de agosto

Estefanía Ojea González foi convocada polo Equipo Nacional para competir no próximo Campionato Europeo, que se celebrará dende o 1 ao 9 de agosto en Maracena, Granada.

A xogadora, que actualmente está cedida ao Barberá Rookies de Cataluña, estará concentrada na misma cidade da celebración do torneo a partir do vindeiro 26 de xullo.

Dende o Club San Francisco Teo, refírense a Estefanía como “un exemplo de superación, traballo e esforzo”, e é que Fany (alcume co que é máis coñecida) comezou no fútbol americano hai só tres anos, tras ter que abandonar o kárate, deporte que practicaba até ese momento, por unha lesión.

“Cunha grande iniciativa e curiosidade por coñecer un novo deporte” chegou a ser, segundo afirman dende o Club teense, “a precursora da práctica feminina deportiva en Galicia” do Fútbol Americano.

Despois dun largo camiño que comezou coa formación do equipo Gladiadoras do CSF Teo, a propia deportista anima a coñecer o Fútbol Americano desde dentro, achegándoo e fomentándoo na sociedade.

#deportes