O Concello de Teo homenaxea a Avelino Pousa Antelo polo seu III cabodano
- HOMENAXE | RSR
- 21 ago 2015
- 2 Min. de lectura
Enmarcado no acto, entregouse á Parroquia de Santa María de Arzúa o caxato de Pousa Antelo por “manter vivos os valores propios da Galicia rural”
No acto celebrado onte, 20 de agosto, no salón de plenos do Concello de Teo e organizado pola Irmandade Avelino Pousa Antelo, a Irmande Manuel María da Terra e a Asociación Cultural Xermolos, reunironse familiares e amigos para recordar a figura do escritor no seu III cabodano.
No encontro, Rafael Sisto foi o encargado de abrir o acto lembrando o “legado cultural e o valor humano que Avelino nos deixou” e mostrouse compracido de que o Concello “siga a ser cada ano o lugar escollido para celebrar a cerimonia de entrega do Caxato do Avelino”, que foi outorgado este ano á Parroquia de Santa María de Arzúa por “manter vivos os valores propios da Galicia rural”. Á entrega sumouse un cadro representativo da figura de Avelino.
O acto continuou cas palabras de Sara Torreiro, veciña da parroquia de Santa María de Arzúa, quen recordou a presencia de Avelino nas festas e puxo en valor “a idiosincrasia rural e o apego ao propio para concluír neste mundo globalizado, idiosincrasia na que él encaixou de marabilla”.
A escritora Navia Ribas tamén estivo presente no acto, lembrando a figura de Avelino cun dos seus textos, co que logo fixo unha reflexión á “dualidade metafórica dun caxato vieiro ou xusticeiro á vez”.
Os actos no Salón de Plenos remataron co agradecemento a todos os asistentes e ás institucións organizadoras e colaboradoras pola parte de Nora Puosa, filla de Avelino, quen felicitou ademais á Parroquia de Santa María de Arzúa por ser a nova portadora do caxato.
A xornada proseguiu polo Paseo Avelino Pousa, nos Verxeis, coa interpretación de “O gateiro nubeiro” a cargo de Raúl e coas palabras de Mini e Mero e da Concelleira de Cultura de Teo, Pilar Faxil, para cerrar o acto. A cerimonia tamén contou coa colaboración do Concello de Teo, o Concello de Negreira e a Asociación Cultural Alfonso Eanes de Barcala.
Comments